Kalibo Aklan ——-Mas pang naging alerto ro mga katapo it kapulisan makarun nga gin-downgrade eun ro probinsya it Aklan sa General Community Quarantine maghalin sa Enhanced Community Quarantine.
Suno kay PSSgt. Jane Vega, tagapaghambae it Aklan Police Provincial Office (APPO) nga sa makarun hay hugot ro andang pagbantay sa mga border pasueod ag pagguwa sa banwa it Kalibo.
Raya hay matapos nga magpinagusto sigon ro kaabuan sa mga pomoeuyo.
Ro iba pang nakabatun it kwarta maghalin sa Social Amelioration Program (SAP) hay nag-shopping.
Ginklaro man kara nga kinahangean sa gihapon magpakita it home quarantine pass agud maka-eapos sa checkpoint.
Ro nagatrabaho hay dapat magpakita it I.D nga nagapamatuod nga sanda hay empleyado it sangka establisyemento.
Samtang, ginpahayag pa ni PSSgt. Vega nga padayun ro pag-check makarun it mga otoridad sa mga papeles it mga nagamaneho it andang saeakyan.
Sambilog sigon raya sa mga tikang agud nga malimitahan pa ro pagpinanaw it mga tawo.
Hugot man nga ginbantayan ro physical distancing sa mga pribado ag pampublikong transportasyon.
Owa man sigon it posibilidad nga pagataw-an pa it pasensya ro mga magabayolar sa mga polisiya sandig sa ginapatuman nga Executive Order nga ginpaguwa ag ginpermahan ni Aklan Governor Florencio Miraflores.
Gin-insister man kara nga owa nagkueang ro mga katapo it otoridad para magtao it impormasyon sa publiko rason nga ro tanan hay dapat magsunod ukon indi hay magapangatubang it nagakaigo nga penalidad.
Samtang, nagpangayo man it kooperasyon si PSSgt. Vega sa mga Local Government Unit (LGU) sa kada Barangay.
Suno kay Pssgt. Vega nga mabahoe ro magiging papel it LGU makarun nga tyempo it GCQ.
Mas makontrol sigon ro hueag it tawo kung mismong mga Barangay Officials ro mag-monitor kara bangud nga sanda ro mas nakakilaea sa andang nasasakupan.
