KALIBO, Aklan—Bukon pa it kontrolado ro African Swine Fever ukon ASF sa banwa it Makato.
Raya ro ginklaru ni Jim Espiritu, municipal agriculturist it nasambit nga banwa.
Suno kana nga virus ro ASF, kun sa siin ro tawo ag kasapatan hay carrier rason nga indi malikawan ro pagkalhit it sakit.
Mag-eowas kara, owa pa it available nga bakuna kontra ASF kamana man nga mabuhay ro life span it virus nga may ikasarang nga mabuhi sa maeamig ag mainit nga tiempo.
Sa barangay Alibagon pa eamang sigon ro may nailistang kaso it ASF base sa resulta it laboratory analysis sa blood sample it nag-euya nga baboy nga ginpadaea sa DA Regional Office.
Gindugang pa kara nga bangud sa pagka-overdose it purga ro rason it pagkamatay it 28 nga mga baboy sa sangka farm sa barangay Baybay.
Samtang, gindugang pa ni Espiritu nga hugut nga ginapatuman makaron ro ginpaguwa nga executive order ni Makato mayor Ramon Anselmo Martin Legaspi III, kun sa siin bawae anay ro pagpasueod ag pagpaguwa it mga buhi nga baboy ag pork meat products partikular sa tatlong barangay nga ginaeakipan it Tugas, Alibagon ag Baybay.
Ginbawaean man ro slaughterhouse nga magbaton it mga baboy nga halin sa nasambit nga mga barangay.
Tuyo kara nga matapna ro pagkalhit it ASF.
Sa pihak nga parte, ginmandu man it alkalde nga taw-an it gahum ro mga punong barangay nga magbantay sa andang nasakupan agud nga engkaso nga may mataeupangdan nga problema hay insigidang matapna.
Nag apela man imaw it bulig ag suporta agud nga maprotektahan ro mga hog raisers ag indi eubusan nga maduea-an it pangabuhian ro mga naga alaga it mga baboy.
Samtang, sangka task force meeting ro ginpatawag kaina it alkalde kaibahan ro mga barangay captains ag kapulisan agud nga matalakay ro instriktong pagpatuman it movement protocols ag biosecurity measures kontra ASF.
Nasayuran nga ap-at eon nga banwa sa Aklan ro nasudlan it ASF ag raya hay ro Batan, Balete, Makato ag Tangalan.
