SPORTS News — Owa eon nagbuhay ro pagtinir it sangka Brazilian swimmer sa Paris, France matapos nga gin-eabag kara ro sueundanan pinaagi sa pagguwa sa Olympic village nga owa nag-ea-ong sa head it andang delegasyon.
Raya hay nakilaea kay Ana Carolina Vieira nga kaparte it women’s 4×100 metre freestyle relay nga nagtapos bilang ika-12 sa heats.
Ginpahayag nga kasunod it event sa La Defense Arena, imaw ag ro anang nobyo nga si Gabriel Santos hay nagdesisyon nga magguwa sa andang ginatiniran nga village ko Hulyo 26 nga owa nagpahisayod sa andang teammates ukon team leader.
Nadiskubrehan raya kat nag-post sanda sa andang social media accounts rason nga gin-report mismo it swimming team sa Brazilian Olympic Committee (BOC).
Insigidang nag-desisyon ro BOC para disiplinahon ro daywa.
Nakabaton it warning si Santos bangud sa anang ginhimo, apang mas grabe ro disiplina kay Vierra bangud ginpa-diretso raya nga mag-uli sa Brazil bangud gin-challenge pa kara ro desisyon it committee sa relay team formation.
Maskin ro swimming leader it nasyon hay owa man nag-apin kay Viera; sa baylo, gintawag raya nga “completely inappropriate” nga pagbinatasan.
“We’re not here playing or taking a vacation … we’re here working for Brazil, for the 200 million taxpayers who are working for us,” pahayag kara sa news agency nga Reuters.
“We can’t play around here. She took a completely inappropriate position to make her point, her dismay, about the formation of the relay.”
Maskin ro pila sa Brazilian netizens hay nagkomento man sa andang pagkadismaya. “They are there with public money, the minimum required is to respect the rules,” pahayag it sambilog sa mga raya.
