Nagkampeon sa Modern Tribal Category it Kalibo Sadsad Ati-Atihan Festival 2026 ro Atras-Abante Tribe maghalin sa banwa it Makato.
Mag-eowas sa pagiging kampeon nga nakakuhit it premyo nga P165,000 pesos, naangkon man nanda ro tatlong special awards nga ginakaeakipan it Best it Ati-Atihan Headdress; Best in Ati-Atihan Costume ag Best it Ati-Atihan Street Dancing nga may tig-P5,000 nga premyo sa kada special award.
Suno kay Noah Remola, lider it Atras Abante Tribe, kapin sa napueong dag-on eon halin kat gintukod ro andang tribu ko dag-on 2016 ag halin kato hay nagapasakop eon sanda sa mga sadsad panaad sa banwa it Makato ag Kalibo.
Ginpaathag ni Remola nga ro andang grupo hay nabilog halin sa family gathering kon sa siin gin-istoryahan it bilog nga pamilya nga magtukod it grupo apang ro iba sa mga raya hay nag-atras ko ulihi.
Apang, bangud sa hugot nga debosyon sa Sto. Niño hay umabante ro pilang pamilya hasta sa daeayon nga nabilog ro grupo nga ginpangaeanan nga Atras-Abante ag kapin sa napueong dag-on eon nga nagapanaad sa Batang Jesus.
Samtang sa pihak nga parte, nabuoe man it tribu Aeang-Aeang ro first runner up ag ro special award nga Best in Ati-Atihan Beat and Sounds.
Nagpangaywang pwesto ro La Promesa; 3rd placer ro Nosi Balasi ag sanda man ro ginkilaea nga Most Discipline Group; 4th runner up ro Golden Kaipan; ginasundan it Blue Birds; Jokers; D’ Imagine ag Tribu Bae-ot Bae-ot.
Ro Sadsad Ati-atihan competition hay ginpatigayon ko adlaw it Sabado ag ro awarding ceremony hay ginpatigayon mat-a ko Dominggo it gabie.
