Nagtaas ro presyo it langis, adlaw it Huwebes kasunod it panibag-ong airstrike it Estados Unidos sa Iran, samtang padayun ro tensyon sa Middle East nga naka-apekto sa pangkalibutanon nga merkado it enerhiya.
Nagtaas it haeos 2 porsyento ro Brent North Sea crude, ro nagapangunang international benchmark, sa $96.13 kada bariles, samtang nagtaas it 1.75 porsyento ro West Texas Intermediate sa $90.23 kada bariles.
Ro pagtaas hay kasunod it naunang pagnaba ko Miyerkules bangud sa pageaum sa pag-angkon it kasugtanan agud nga mapanaba ro tensyon sa rehiyon. Sa pihak kara, ro panibag-ong military action it Estados Unidos ag Iran hay uman nga nagtuga it pagkabaeaka sa suplay it langis, partikular sa Strait of Hormuz, nga importanteng aeagyan it pangkalibutanon nga kalakalan it langis.
Suno sa sangka opisyal it Estados Unidos, ginpabagbag it andang militar ro ap-at nga Iranian drones ag gin-atake ro sangka control center sa Bandar Abbas sa nakatungdan nga parte it Iran.
Sa pihak it naga-grabeng tensyon, ginpahayag it sangka opisyal it Iranian Revolutionary Guards nga imposible ro panibag-ong giyera kontra sa Estados Unidos apang haum ro Iran nga magsabat sa anumang pag-atake.
