Arestado ro sangka 27-anyos nga babaye matapos nga gina-alegar nga magbaligya it pekeng tiket para sa nagahilapit nga BTS concert. Ginpangunahan it Cyber Financial Crime Unit it Philippine National Police Anti-Cybercrime Group (PNP-ACG) ro operasyon kontra sa suspek nga sangka IT professional.
Base sa imbestigasyon, nagpasaka it reklamo ro pilang biktima matapos nanda nga matukiban ro mga concert ticket nga andang ginbakae hay nabaligya man sa iba.
Ginbaligya sigon it suspek ro mga tiket sa balor nga P14,200, kaibahan eon ro ARMY fan club membership fee, samtang ro orihinal nga presyo it bleachers ticket hay P13,500.
Sambilog sa mga biktima hay nakabayad eon it P10,000 bilang paunang bayad ag nakataeanang bayaran ro nabilin nga P4,200 sa oras it pirmahan. Sa pihak kara, nagpadaea sigon it mensahe ro suspek nga nakaangkon it problema sa ticketing service. Kat magpangutana ro biktima sa sangka group chat, natukiban nana nga may iba pang nakabakae it kaparehong tiket.
Bangud kara,l nagpangayo it bulig ro biktima sa PNP-ACG nga nagpatigayon it entrapment operation nga nagresulta sa pagka-aresto it suspek. Nagapangatubang imaw makaron sa kasong estafa sa idaeum it Article 315 it Revised Penal Code ag pageabag sa Cybercrime Prevention Act of 2012.
