NATIONAL News — Kumpiyansa ro gobyerno nga ro bag-ong ginapatuman nga value-added tax (VAT) refund program para sa dumueuong nga turista hay makapabaskog sa turismo ag retail sectors it nasyon.
Ginpahayag ni Presidential Communications Office Undersecretary ag Palace Press Officer Claire Castro nga ro bag-ong ‘scheme’ hay kaibahan sa inisyatibo it gobyerno nga mapataas ro tourist arrivals ag engganyuhon ro foreign tourists nga gumastos pa sa Pilipinas, samtang ginapabakod ro pag-umwad it ekonomiya.
“Ito po ay isang paraan lamang po para mas marami pong turista ang pumunta sa ating bansa at ito din po ay makakapag-engganyo rin po na bumili ng mga produkto dito sa ating bansa,”pahayag ni Castro.
Dugang pa kara nga tuyo it inisyatibo nga obrahon nga mas ‘competitive shopping destination’ ro nasyon.
Nauna kara, ginpirmahan it mga opisyal it Department of Finance, Bureau of Customs ag Bureau of Internal Revenue ro implementing rules and regulations (IRR) para sa VAT Refund for Non-Resident Tourists.
Tuyo kara nga pasugtan ro mga foreign tourists nga mag- apply para sa sangka value-added tax refund para sa locally purchased goods halin sa accredited stores.
Sa idaeum it Republic Act 12079, ro mga non-resident tourists ukon foreign passport holders hay pwedeng mataw-an it VAT refund para sa locally purchased goods nga nagabalor it P3,000, nga pagadaehon sa guwa it nasyon bilang accompanied baggage sa sueod it 60 diyas halin sa petsa it pagbakae.
Ro IRR hay ginpirmahan nanday Finance Secretary Ralph Recto, Bureau of Customs commissioner Bienvenido Rubio, ag Bureau of Internal Revenue deputy commissioner Marissa Cabreros.
Ginsaksihan raya nanday Tourism Secretary Christina Garcia-Frasco, ag Office of the Special Assistant to the President for Investment and Economic Affairs Secretary Frederick Go.
