IBAJAY, Aklan — Eubusan eon nga ginsarado sa mga motorista ro old bridge ukon mas kilaea sa tawag nga Colongcolong bridge sa banwa it Ibajay, matapos mahugos ro sangka parte kara ag makaangkon it mabahoe nga buho sa kilid.
Suno kay Ibajay Mayor Jose Miguel Miraflores nga nahugos ro suporta sa idaeum it tulay tuga it mabaskog nga sueog it tubi sa pagpanaeasa it bagyong Opong, kun sa siin, ro nasambit nga banwa hay ginpaidaeum sa state of calamity kasunod it naeksperyensiyahan nga flashflood.
Sa ginpatigayon nga inspeksyon it mga awtoridad, nakitang bukon eon it eowas nga agyan ro nasambit nga tulay rason nga insigida raya nga ginbutangan it abang ag warning sign agud nga malikawan ro aksidente.
Dugang pa nga mabuhay eon nga nakaangkon it samad ro pilang parte it tulay bangud sa kalumaan nga ginasugid nga gintukod kato pang 1936 ukon antes ro Giyera Mundiyal Numero Dos, kun sa siin ro Aklan hay sa idaeum pa it pagdumaea it probinsiya it Capiz.
Matapos nga mahuman ro bag-ong tulay ko 2008, padayun nga ginapasugtan nga maka agi ro mga light vehicles ag mga residente sa lumang tulay sa pihak it pag-angkon it lamat sa anang structural design.
Ginagamit raya paagto sa ilaya nga parte it banwa.
Mas pa raya nga nahalitan sa pagtama it linog ko gabi-e it Setyembre 30, kun sa siin ro epicenter hay sa Bogo, Cebu nga nakalista it magnitude 6.9 nga pag-uyog.
Sa pihak nga parte, plano nana nga ipa-usisa sa DPWH kon pwede pang mapaidaeum sa repair ro tulay agud nga ma-preserve bangud sa anang historical value.
Ginklaru man nana nga owa raya it epekto sa biyahe it mga naga-agi sa national highway sa andang banwa bangud sa mabuhay eon raya nga owa ginagamit.
