KALIBO, Aklan–Nagpabor ro Banga Transport Group Cooperative sa uman nga pagpaeawig it Land Transportation Franchising and Regulatory Board (LTFRB) sa deadline it Public Utility Vehicles (PUV) modernization program it gobyerno hasta Disyembre 31, 2023.
Nauna eon nga nagpanawagan ro nagkaeain-eain nga transport group ag mamalidha sa nasyon nga indi anay pagmadalion ro pag-phaseout it mga traditional jeepney nga nagabiyahe sa bilog nga nasyon.
Suno kay Rodrigo Almojin Jr., presidente it Banga Transport Group Cooperative nga maabu pang driver ag operator ro owa pa natapos nga magproseso ag nagahueat nga ma-releasan it ginakinahang-ean nga dokumento halin sa LTFRB.
Gin-insister man kara nga bukon it madali ro magproseso it mga papeles bangud nagakinahang-ean raya it bastante nga panyempo.
Nasayuran nga kinahang-ean nga magpasakop it mga driver ag operator sa sangka kooperative or korporasyon agud nga ma-release kanda ro mga modernize jeepney.
Sa makaron ginahueat pa it mga transport group ro mga local transport plan.
