KALIBO, Aklan — Naka-abot eon ro bangkay it sangka overseas Filipino worker (OFW) sa Brgy. Ogsip, Libacao nga gina-alegar nga nahueog sa hagdan it baeay nga anang gina-istaran sa Turks and Caicos, isla nga sakop it British Overseas Territory.
Suno kay Maribel dela Cruz, asawa it 60 anyos nga OFW nga si Gil Ibanez dela Cruz nga nag-abot ro bangkay it anang asawa nga nakasueod sa sangka kahon ro Sabado nga adlaw sakay it sangka private plane.
Apang ro anang mister hay namatay may tatlong buean eon ro nakataliwan kun sa siin nabuhayan ro pag-release sa anang bangkay bangud nga gin-imbestigahan pa it mga awtoridad ro insidente.
Ginpakamayad sigon nanda nga igapaidaeum it uman sa autopsy ro eawas it anang asawa bangud nga owa man sanda it ginabuytan nga autopsy report nga ginpatigayon it gobyerno it Turks and Caicos.
Dugang pa nga ro “cause of death” hay pneumonia kabaliskaran sa gin-report kanda nga namatay imaw matapos nga mahueog sa hagdan nga may kataason nga 4 to 9 feet.
Mabahoe man sigon ro andang pagduda nga may foul play sa anang pagkamatay bangud nga puno it gaob ro eawas it anang mister.
Si dela Cruz hay ginasugid nga nakipag-inuman anay sa anang mga katrabaho ag pagkatapos nga mag-uli sa anang ginadayunan hay natabu ro insidente ko nagtaliwan nga Oktubre 31, 2024.
Nadaea pa raya sa ospital apang makataliwan ro tatlong adlaw hay binawian it anang hueam nga kabuhi.
Nag apela si Maribel nga hueaton lang ro resulta it autopsy nga andang ginhinyu agud nga masayuran ro matuod kara nga ginkamatay.
Sa pihak kara, mabahoe man ro anang pasaeamat sa kompaniya it anang asawa bangud sa pag-aksyon sa andang hinyu nga mapa-uli ro anang bangkay.
Samtang, eubus man ro anang kasubo bangud nga naduea-an it ama ro anang limang mga unga kun sa siiin ro andang kamanghuran hay Grade 8 pa eamang.
Raya man sigon ro rason nga nagtinguha ro anang asawa nga magtrabaho sa ibang nasyon nga maeayo kanda agud nga mapa eskwela ro anang mga unga ag mataw-an sanda it maayos nga pagpangabuhi.
Raya eon ro ikaywang balik it anang asawa sa nasambit nga nasyon pinaagi sa “direct hiring” nga nagtrabaho bilang plumber sa sangka construction company .
