Ginpatawag it European Union ag pilang nasyon sa Europa ro mga representante it Russia matapos magpamaeag ro Moscow it posibleng pag-atake sa Kyiv ag pag-engganyo sa mga dumueuong, kaibahan ro mga diplomat, nga magbakwit halin sa kabisera it Ukraine.
Kaibahan sa mga nag-summon it Russian envoys ro Germany, Norway, Netherlands, Poland, ag Sweden, kasunod it pahayag it Russia nga target kara ro mga military facility ag “decision-making centers” sa Kyiv.
Suno sa EU diplomatic service, ginpatawag nanda ro Russian chargé d’affaires agud nga ipahayag ro hugut nga pagkontra sa ginatawag nanda nga “unacceptable escalation,” ag gin-insister nga nagapabilin ro EU delegation sa Kyiv sa pihak it tensyon.
Sa Norway, ginpatawag si Russian Ambassador Nikolai Korchunov agud nga ipaathag ro gina-alegar nga “explicit threats against foreign personnel in Ukraine.”
Ro Poland man hay nagpanawagan it insigidang pagpundo sa ginatawag kara nga “unlawful aggression” it Russia.
Samtang, ginpamalibaran it Russian embassy sa Germany ro mga pasibangud ag gin-insister nga “surgical strikes” eamang ro andang ginapatigayon kontra sa mga target nga militar.
Suno sa Moscow, ro planong operasyon hay sabat sa gina-alegar nga “terrorist attacks” it Kyiv, kaibahan ro insidente sa Luhansk nga ginkamatay it 21 nga katawo, sangka pahayag nga ginpamalibaran it Ukraine, nga ginasugid nga ro target hay sangka Russian drone unit.
