IBAJAY, Aklan—Nagapanguna ro banwa it Ibajay sa mga munisipalidad sa bilog nga probinsya it Aklan nga may mataas it kaso it dengue sa unang daywang buean it dag-on 2025.
Sa datos maghalin sa Rural Health Unit it banwa it Ibajay, ginpahayag ni Dr. Antonio Maagma nga halin Enero 1 hasta it Pebrero 25, 2025 hay nakalista eon ro andang taeatapan it 56 nga kaso it dengue nga base sa clustering, ro Barangay Ondoy ro nakalista it pinakamataas nga numero it mga tinamaan it dengue nga nagaabot sa 9; ginsundan it Barangay Laguinbanwa nga may 6 nga kaso ag Barangay Agbago nga nakalista it 5 dengue cases.
Ginpahayag dugang ni Dr. Maagma nga uwa nanda ginaekspektar ro mabahoe nga pagtaas it kaso it dengue bangud nga kon ikumpara ko nagtaliwan nga dag-on sa kaparehong buean hay nakalista eamang sanda it 16 nga dengue cases.
Ginatan-aw nga rason it health officer sa pagsaka it kaso it dengue sa andang banwa hay ro sigidas nga pag-inuean kon sa siin madasig nga nag-inabo ro mosquito specie nga Aedes Aegypti ag Aedes Albopictus.
Bangud kara, mas pa nandang ginpabaskog ro andang kampanya kontra sa dengue kon sa siin may series of coordination nga ginpatigayon sa mga kabaryuhan agud nga ipaabot sa mga raya ro nagakaigong tikang nga pagahimuon sa pagtapna it pagtinaas it kaso it dengue.
Samtang, striktong ginapatuman it mga health expert sa mga pumueoyo ro pagsunod sa 5’S strategy nga ginakaeakipan it Search and destroy mosquito breeding places parehas it mga kariton, ka-ang, balde ag drum; Secure self-protection paagi sa pagsuksok it pantalon, long sleeved nga mga eambong, ag mosquito repellant; Seek early consultation kapin gid kung may sintomas it dengue pareho it mataas nga eagnat ag paeanakit it eawas; Support fogging and spraying sa mga hotspot areas; ag Sustain hydration kapin gid kung ginaeagnat bangud sa dengue.
