KALIBO, Aklan—Medyu malabo ag mabuhay pa nga maangkon ro naging pahayag ni Pangueong Ferdinand “Bongbong” Marcos Jr. nga may mabakae eon nga bugas nga nagabalor it 25 pesos sa mga baealigyaan.
Suno kay Larry Villanueva, presidente it Lezo farmers association nga nagakabaeaka sanda para sa paeaabuton it sektor it pagpanguma ag food security it nasyon engkaso nga ipatuman ro nasambit nga polisiya.
Sa makaron suno kana ro presyo it paeay nga ginabakae it mga negosyante hay naga-abot sa 14 hasta 15 pesos ro eabtong ag 19 pesos ro uga.
Samtang ro bugas hay ro pinaka-manaba hay 35 hasta 40 pesos.
Buot hambaeon nga engkaso nga panabaan ro presyo it bugas, ro epekto karon hay maganaba man ro pagpamakae it paeay sa mga mangunguma.
Ginpahayag dugang nga magatuga pa raya it mas nga pagkalugi sa mga rice farmers, kun sa siin nauna eon nanda nga gina antus ro mahina nga patubas bangud sa pagpanaeasa it peste nga eanggam sa andang pananum kamana man ro mahae nga presyo it abono ag ro pagpanaeasa it bagyo.
Samtang, mabahoe sigon ro andang igapasaeamat kon makaangkon it 25 pesos per kilo nga bugas bangud nga magadaeawat eon lang sanda.
