KALIBO, Aklan– Dismayado ro grupong Bagong Alyansang Makabayan ukon Bayan Aklan sa ikaywang State of the Nation Address ukon SONA ni Pangueong Ferdinand Marcos Jr.
Suno kay Kim Sin Tugna, provincial coordinator it Bayan Aklan nga puro pabida ro mga ginsambit it presidente sa anang SONA kon sa siin uwa gid it nabatian ag nakit-an nga tikang sa administrasyon agud nga mapahagan-hagan ro presenteng sitwasyon it mga Pilipino.
Raya hay bangud sa sigidas nga nagapakalisod sa mga pumueoyo ro pagtaas it mga baeak-eon, importasyon it bugas ag mahae nga pestisidyo nga nagapalugmok sa mga mangunguma kamana man sa mga mangingisda nga ginaharass sa mismong teritoryo sa West Philippine Sea.
Ginpahayag dugang ni Tugna nga nakueangan sanda sa pagdumaea it nasyon ni Marcos ag uwa it ginahimo nga tikang para mabuhinan ro kapigaduhon it kaabuan.
