KALIBO, Aklan—Nasubuan ro Bagong Alyansang Makabayan ukon Bayan Aklan nga bukon it tanan nga apektadong hog raisers hay mataw-an it ayuda it gobyerno probinsyal eabi eon ro mga namatayan it baboy nga sanda mismo ro gin-eobong ukon uwa ginpaidaeom sa culling ro andang sapat.
Raya ro naging reaksyon it Mr. Kim Sin Tugna, provincial coordinator it Bayan Aklan kasunod it pahayag it Office of the Provincial Veterinarian ukon OPVET nga limitado eamang ro pondo nga gintaeana para sa mga apektado it ASF virus.
Raya hay matapos nga sa P10 milyon pesos nga gin-alokar it provincial government halin sa P25 milyon pesos nga quick response fund hay P7 milyon pesos eamang ro maadto sa mga apektadong hog raisers ag ro P3 milyon pesos hay para sa logistics it OPVET.
Panindugan ni Mr. Tugna nga may pondo ro OPVET rason nga inde eon nanda kinahang-ean pang makitunga sa pondo nga gintaeana para kunta sa mga apektadong hog raisers para ro tanan hay makasamit it ayuda.
