KALIBO, Aklan—Naga-ugyon ro Bagong Alyansang Makabayan ukon Bayan-Aklan sa iba pang grupo nga nagapanawagan nga suspindihon anay ro implementasyon it Public Utility Vehicle Modernization Program.
Suno kay Kim Sin Tugna, provincial coordinator it Bayan-Aklan nga hilaw ukon bukon it planado ag matsa ginmadali ro pagpatuman it nasambit nga programa.
Maabu pa suno kana nga mga drivers ag operators ro owa nagpasakop sa consolidation program rason nga posible sanda nga maduea-an it pangabuhian kon eubusan nga iga-phase-out ro andang mga iconic jeepney.
Mag-eowas kara, owa pa sigon naresolba it Department of Transportation ro isyu angot sa mataas nga presyo it modern jeepney kon sa siin makabig raya nga bukon it makatawo.
Panigurado suno kay tugna nga maabu nga mga ordinaryong drivers ag operators ro indi makasarang nga magbakae it haeos 2.4 milyon pesos nga balor it modern jeepney.
Nagapati man ro grupo nga posibleng may kickback ro mga taga-DOTr ag LTFRB halin sa mga dumueuong nga mga kompanya nga naga-obra it modern jeepney bangud sa padayun nanda nga magpamalibad sa gina-offer nga mas barato nga “local made” ukon iya sa pilipinas, iga-manufacture nga haeos 900,000 pesos ro kantidad .
Mag-eowas kara, ginpahayag nga bukon pa it maayos ro ruta ukon Local Public Transport Route Plan ukon LTPRP nga paga-obrahon it natungdan nga local government units kun sa siin raya ro sambilog sa mga requirements it PUV modernization .
Hasta nga owa sigon it klaru nga patakaran angot kara hay mabutang sa aeang-aeang ro pangabuhian it mga drivers ag operators pati ro andang mga pamilya nga nagasalig sa andang kita adlaw adlaw .
