KALIBO, Aklan — Natumod eon it Bureau of Fire Protection ukon BFP-Aklan ro ginhalinan it kaeayo nga nagpa-ugdaw sa haeos 80 porsiyento it Kalibo Public Market ko aga-aga it Setyembre 15.
Raya ro ginkumpirma ni FO2 Alvin Patricio, public information officer it BFP-Aklan.
Mag-eowas kara, nadiskubre eon man sigon it andang mga imbestigador ro kabangdanan it sunog, apang nagpamalibad anay nga magtau it dugang nga detalye bangud nga owa pa sigon nanda natapos ro final investigation report.
Samtang, gindugang pa ni Patricio nga ginakonsidera nanda nga aksidente eamang ro natabu nga sunog bangud nga haeos 21 anyos eon sigon nga naga-okupa ro stall owner kat raya hay matabu sa anang pwesto.
Ginapatihan nga faulty electrical connection ro rason it sunog .
Samtang, sa listahan it Municipal Social Welfare and Development Office ukon MSWDO-Kalibo, naga-abot eon sa 347 nga stall owners ro naapektuhan it sunog halin sa 270.
Apang ginahueat pa sigon nanda ro listahan it LGU-Kalibo para sa iga-isyu nga fire incident certificate para sa pag-claim it assistance it mga biktima.
Ro initial nga danyos hay nagapabilin sa P35 milliion.
Ro sunog hay ginpasaka sa general alarm ni Provincial Fire Marshall Supt. Nazrudyn Cablayan.
