KALIBO, Aklan–Naga-abot sa P232,875 ro estimated nga danyos it sunog nga nagpa-ugdaw sa sangka residential house ag storage room sa Abierra Road, Roxas Avenue Extension, Barangay Andagao, Kalibo kahapon it hapon.
Suno kay FO1 Rene Ajusan, arson investigator it bureau of fire protection ukon BFP-Kalibo nga ro nasambit nga kantidad hay posible pang madugangan bangud nga nagapadayun pa ro andang imbestigasyon.
Pasado alas-12 kahapon it hapon hay natabu ro sunog nga umabot sa ikaywang alarma.
Naging madamoe ag masakit sa mata ag ilong ro asu bangud sa mga nasunog nga PVC pipes ag iba pang electrical materials nga nakatambak sa storage room.
Sa pihak nga parte, ginpahayag ni FO1 Ajusan nga owa pa sanda it mabakod nga ebidensiya ag testigo nga ginhungod ro sunog kapareho it alegasyon it pamilya Lopez.
Nauna eon nga gin-insister it pamilya nga ro andang 24 anyos nga kabulig nga miyembro it LGBTQ community ro responsable sa insidente.
Antes sigon nga natabu ro sunog hay owa it ibang tawo sa andang baeay kundi nga imaw eamang.
Mag-eowas kara, nagtinangis man raya matapos nga magdesisyon sanda nga pahalinon eon imaw sa trabaho, apang owa naila nga mag-uli sa andang baeay sa Barangay Daja Norte, Banga.
