KALIBO, Aklan—Nagpaabot it simpatiya ro bilog nga miyembro it Liga ng mga Barangay it Kalibo sa pamilya ni Punong Brgy. Victor Matanga it Brgy. New Buswang, Kalibo kasunod it anang pagkamatay kahapon it agahon.
Suno kay Ex Officio SB member Ronald Marte, ginakasubo nanda ro pagkamatay it kaparehong opisyal kon sa siin mabahoe imaw nga kawad-an sa nasambit nga barangay bangud nga makabig raya nga mayad nga lider it baryo.
Maskin may ginabatyag sigon nga masakit hay una gihapon imaw sa pagserbisyo sa anang mga pumueoyo.
Ginpahayag dugang ni Marte nga haeos tanan nga assistance hay ginata-o kara sa anang mga constituents kutob sa anang masarangan.
Uwa sigon it ikapintas kay Matanga bangud nga mabinuligon imaw sa anang mga pumueoyo ag uwa it ginapili maskin sin-o.
Nasayuran nga last term eon lang makaron ni Matanga sa pagiging kapitan ag uwa man nana gintago ro anang health condition.
Pila sa mga naging proyekto it opisyal hay ro pagpasaayos it karsada, drainage system ag maabong iba.
Nauna eon nga naka-on leave ro kapitan bangud sa anang masakit sa kidney nga makapilang beses eon sigon nga nagpaidaeom sa dialysis.
Kapin sa 27 anyos nga nagpanerbisyo sa publiko ro kapitan kon sa siin nag-agi anay imaw sa pagiging kagawad.
