KALIBO, Aklan — Kanselado gihapon makaron ng adlaw it Martes ro tanan nga biyahe it motorbanca paagto sa isla it Boracay ag mga barko nga pahalin it Aklan paagto sa Batangas ag pabalik bangud sa epekto it bagyong Dante.
Ro naaminhan nga parte it Aklan hay sa idaeum makaron it storm signal no. 2, kun sa siin umpisa kabi-i hay naka-eksperiyensiya it mga mabaskog nga pag-uean hasta makaron nga agahon samtang nagapaeapit ro pag-landfall kara sa bisinidad it Romblon.
Sa sangka advisory it Philippine Coast Guard (PCG)-Aklan, ginpahayag nanda nga temporaryo nga owa anay it biyahe makaron nga adlaw ag abangan eon lang ro panibag-ong anunsyo.
Magadepende sigon sa magiging masunod nga weather bulletin nga igapaguwa it Philippine Atmospheric, Geophysical and Astronomical Services Administration (PAGASA) kun hin-uno uman nga pagapasugtan ro normal nga operasyon it mga saeakyang pang-eawod.
Samtang, bangud sa mabaskog nga buhos it ulan, nakaeksperiyensa it hasta sa gutter deep nga pagbaha sa pilang lugar sa banwa it Kalibo.
