KALIBO, Aklan–Nakalista it kabilugan nga 144,880 nga tourist arrivals sa Isla it Boracay umpisa Marso 1 hasta 31 suno sa Malay Tourism Office.
Suno kay Chief Tourism Operations Officer Felix delos Santos, sa nasambit nga numeo haeos 20% kara ro mga dumueuong nga turista ag ro nabilin hay mga domestic tourists.
Umpisa nga ginhaeugaan ro restrictions pasueod sa isla ag buksan ro borders it Pilipinas para sa mga foreigners umpisa ko Pebrero 10, nakalista sanda it 4,000 hasta 6,000 nga turista kada adlaw.
Masyado sigon raya nga maeayo sa carrying capacity nga 19,000 per day.
Kumpiyansa sigon sanda nga mas pang maga-umwad ro turismo sa Boracay nga makabulig it mabahoe sa ekonomiya partikular sa long week-end sa pagdumdum it semana santa.
Umpisa Abril 1 hay welcome eon man ro tanan nga mga foreign tourist kaibahan ro mga halin sa visa countries.
Samtang, ginpahayag ni delos santos nga sa Lunes hay magapueong sanda kaibahan ro natungdan nga ahensiya it gobyerno para sa mga igapatuman nga contingency measures sa pagbuhos it mga bisita.
Kinahangean suno kana nga masiguro ro peace and order kamana man ro seguridad ag pagsunod sa health and safety protocols it mga turista.
Sa mga dumueuong nga nag-abot sa Boracay, pinakamaabu ro halin sa Estados Unidos, ginsundan it United Kingdom, France, Canada, Singapore ag South Korea.
Ro Covid-19 vaccine certificates eamang ro kinahangean makaron agud nga makasueod sa Boracay nga owa it anuman nga restrictions.
Haeos bukas eon man ro tanan nga establisimento sa isla mag-eowas sa disco bars.
