KALIBO, Aklan—Ginaeauman nga pagadagsaon eon man it mga debotong Katoliko ro Bukid Tigayon, ginakabig nga sambilog sa mga nagapanguna nga pilgrim sites sa Aklan bilang pagdumdum makaron nga Semana Santa.
Suno kay Roelyn Lachica, caretaker it Bukid Tigayon nga gina-umpisahan eon nanda ro pagbutang it mga signages nga magiging giya it mga bisita ag deboto.
Sa adlaw it Huwebes Santo ag Biyernes Santo hay igapatuman ro one entry, one exit policy sa pagsaka sa bukid agud nga malikawan ro paggutok it mga tawo.
Sikat ro Tigayon Hill sa mga gustong magpatigayon it Via Crucis, pagpabaskog it espiritwal nga koneksyon sa Diyos ag nagakabagay man sa mga nature lover.
Agud nga makaabot sa maisot nga simbahan ukon kapilya sa alipunto it bukid, kinahangean nga sakaon ro 144 nga halintang it hagdan.
Makita man sa ibabaw ro rest areas ag viewing deck kun sa siin makita ro aklan river kamana man ro ginakabig nga longest bridge sa bilog nga western visayas nga nagakonekta sa banwa it Kalibo ag Lezo.
Nagpakalhit man it mga trash can agud nga malikawan ro pagkalhit it mga basura.
Agud nga mabantayan ro daeagan it trapiko ag seguridad it mga Kristiyano nga nagahimo it andang tradisyon ag nakasanayan nga obrahon kada tiempo it Kuwaresma, nagadeploy ro kapulisan it dugang nga pwersa kabulig ro barangay tanod ag iba pang force multipliers sa nasambit nga lugar.
Mag-eowas kara, may nakabantay man nga medical team it MDRRMO-Kalibo.
Sa pihak nga parte, magapadayun suno kana ro “bugae it tigayon” kun sa siin ginabaligya sa ubos it bukid tigayon ro mga produkto halin sa nasambit nga barangay.
