Nakataeana eon nga isalang sa inquest proceedings ro sangka ginadudahan nga pekeng Pinoy.
Kasunod raya it pagka-aresto sa 49-anyos nga suspek it Bureau of Immigration ag insigidang gindaea sa Legal Division para sa inquest bangud sa pag-eabag sa Philippine Immigration Act.
Suno kay Bureau of Immigration (BI) Travel Control and Enforcement Unit (TCEU) acting head Ann Camille Mina, ro suspek hay sangka Canadian.
Ginrefer raya sa primary inspectors matapos nga ginhana nga magsakay it eroplano paadto it Taiwan sa pamagi it Eva Air flight sa Ninoy Aquino International Airport (NAIA) Terminal 1.
Nagpresenta ro foreign-looking suspect it Philippine pasaporte apang nagduda sigon ro mga Immigration officers matapos masayuran nga indi raya kaantigo maghambae it Filipino ukon ano mang Philippine dialect.
Kamana man nga owa kara masabat ro mga basic questions kaangot it anang identity.
Nagaguwa man sa database it Bureau of Immigration nga ro suspek hay nakapilang biyahe eon sa nasyon gamit ro Canadian ag Hong Kong passport ag may buyot man raya nga permanent residence visa.
Kat isalang sa interview, gin-aku sigon it suspek nga ro anang abogado ro nagproseso sa anang birth certificate para maka-apply it passport.
Apang, ro duda it BI officers, ro passport ag birth certificate it suspek hay peke man nga nabuoe.
