Ginsuhestyon ni New Washington vice mayor Jesus Quimpo sa Metro Kalibo Water District ukon MKWD sa ginpatigayon nga legislative inquiry it Sangguniang Bayan nga dapat makaangkon it monthly inspection sa mga kagamitan nga ginaagyan it tubi paadto sa mga kabaeayan it nasambit nga banwa kasunod it ginpaguwa nga test results it Microbiological Analysis it Department of Health (DOH) Western Visayas Center for Health Development kon sa siin nag-positibo sigon sa E-coli bacteria ro supply it tubi nga nagatubod sa mga gripo it pilang kabaeayan.
Mag-eowas kara, ginsuhestyon dugang it bise alkalde nga maghimo it monthly water sampling and testing agud nga masiguro nga malimpyo ro tubi nga ginagamit it mga pumueoyo eabi eon makaron nga nagapangatubang sa krisis ro nasyon nga bukon it tanan hay masarangan nga magbakae it refilled water.
Suno pa kay vice mayor Quimpo, kinahang-ean sa tanan nga oras ro malimpyo nga tubi ag kinamatarong it mga konsumidor nga maserbisyuhan it eksakto bangud nga obligado man ro mga raya nga magbayad sa andang monthly water bill.
Madumduman nga naghimo it tikang ro lokal nga gobyerno agud nga mapatigayon ro water testing sa kabaeaka nga maeobog ro nagatubod nga tubi halin sa gripo it pilang kabaeayan sa nasambit nga banwa.
