KALIBO, Aklan — Mas maabu ro maduea sa China kon magpatuman sanda it economic sanction sa Pilipinas angot sa mainit nga isyu sa West Philippine Sea .
Suno kay Atty. Axel Gonzales, mas mabahoe ro maduea sa China kon magtaeana sanda it trade war sa Pilipinas bangud nga kaabuan sa mga nagagamit it andang produkto hay mga Pilipino.
Engkaso man suno kana nga indi sanda magabakae it mga agricultural products it Pilipinas hay haum man nga magbulig ro atong mga kaalyadong nasyon.
Masarangan sigon nga pun-an it Amerika ag Japan ro gap engkaso nga magpatuman it economic sanctions ro China bangud nga ro Japan ag United States hay ro pinakamabahoe nga trading partners it nasyon.
Sa pihak nga parte, nagapati si Atty. Gonzales nga masarangan nga maresolba sa matawhay nga pamaagi ro isyu sa WPS bangud nga maskin ro China hay nagapangaman man sa posibleng maging resulta engkaso nga atakehon nanda ro Pilipinas kun sa siin haum nga rumesbak ro Amerika ag Japan ag iba pang kaalyadong nasyon.
