Ginkumpirma it Bureau of Fisheries and Aquatic Resources ukon BFAR region VI nga uwa it presensya it red tide toxin ro coastal areas it banwa it Batan, Altavas ag New Washington.
Raya hay maskin nga kumpirmadong may red tide toxin sa probinsya it Capiz partikular sa coastal area it Pilar, Roxas City, Ivisan ag Sapian.
Ginpaathag ni BFAR regional director Remia Appari nga base sa resulta it water sample nga andang gin-usisa, manaba sa 10 milligram ukon uwa nakaabot sa 60 milligram regulatory limit ukon ro ginatawag nga 60 microgram per 100 grams of shellfish meat nga andang basehan para magdeklara nga may red tide toxin ro sangka coastal area.
Bangud kara, eowas suno kana nga kan-on ro mga shellfish ukon panginhason maghalin sa nasambit nga mga banwa.
Apang, kinahang-ean man nga malimpyo ro pagkaeaha ag naeaha it mayad antes nga kan-on.
Samtang, ulihi nga nakaangkon it red tide toxin sa Western Visayas hay ko 2015 pa kon siin raya hay sangka natural phenomenon.
Ginakabig nga factor ro mga higko nga halin sa upland nga nagadeohog sa kaeawran kaparehas it pesticides, compost, fertilizers nga ginagamit ag maabong iba pa.
Ginpaathag ni Appari nga may nutrients sigon kara nga mabueo nga nagatriger sa Pyrodinium bahamense nga specie it red tide nga nagaproduce it saxitoxins ag posibleng magtuga it paralytic shellfish poisoning (PSP).
Sa pihak nga parte, ginpanugyan ni Appari nga kinahang-ean nga maging mapagbantay nga inde makasueod sa Aklan ro mga fishery products maghalin sa probinsya it Capiz.
Sa raya nga pamaagi suno kana hay makalikaw sa poison ro publiko.
