Ginsugo eun ni Department of Agriculture Secretary Francisco Tiu Laurel Jr. ro pagpanupod it dugang nga NFA rice para sa mga lokal nga gobyerno nga apektado it pagdaeasa it bagyong Kristine.
Sa Palace situation briefing kahapon, suno sa sekretaryo nga magserbi raya nga pahaom para sa pagsueod it posibleng bagyo sa Philippine Area of Responsibility makarong weekend.
Nakabulig man sigon ro temprano nga pag-ani it mga paeay sa nagkaeain-eain nga rehiyon agud mabuhinan ro kabilugan nga kasamaran nga gin-aywan it bagyong Kristine.
Ginsiguro man it sekretaryo kay Pangueong Ferdinand Marcos Jr. nga may bastante nga suplay it bugas kasunod it pagbakae it NFA it paeay halin sa lokal nga mangunguma ku nagtaliwan nga anihan.
May una man sigon nga nakataeana nga Kadiwa stores sa Camarines Sur ag presente eun nga ginapanupod ro NFA rice nga ginbakae it mga lokal nga gobyerno.
Samtang, nauna eun nga ginpahayag it National Food Authority nga may bastante nga stock it bugas sa bilog nga nasyon nga magabuhay it 6.5 days ag katumbas it 4.3 million bags it NFA rice.
