KALIBO, Aklan—Ginkumpirma ni Atty. Harry Sucgang nga gin-imbitahan ni dating Aklan governor Florencio Miraflores si dating Kalibo mayor Emerson Lachica.
Apang, uwa pa sigon it positibong istorya angot sa mga alliances bangud nga uwa pa it kumpirmasyon kon masaylo si Emerson sa grupong Tibyog Akean.
Para kay Atty. Sucgang nga malisod eon tumbahon ro Tibyog bangud nga haeos tanan nga kabanwahanan hay anda eon nga ginabuytan ag uwa eon it oposisyon nga nakasueod mag-eowas eon lang sa banwa it Batan ag Makato.
Sa ana nga pagkasayod ro posibleng plano hay manaog si Aklan first district Carlito Marquez sa banwa it Kalibo bilang alkalde ag maging bise alkalde nana si Lachica apang uwa pa sigon raya kumpirmasyon ag kasiguraduhan bangud nga medyo maeayo pa ro eleksyon.
Ro klaro sigon makaron hay mabaskog man nga alkalde si mayor Juris Sucro ag kon ro banwa it Kalibo ro ginapanimbangan hay nasa linyada eon man nanda bangud kay mayor Sucro.
