KALIBO, Aklan — “Handum nga nataw-an it katumanan.”
Raya ro ginpahayag it bag-ong promote nga si P/Brig. Gen. Aden Lagradante .
Suno kana nga handum it kada pulis nga mataw-an it promotion rason nga eubus ro anang kalipay sa anang achievement nga naangkon.
Nasayuran nga kaibahan si Lagradante sa ap-at nga senior officials it PNP nga nataw-an it promosyon kan-o eamang.
Ginahaead sigon nana ro anang promotion sa anang pamilya nga nagsuporta sa anang challenging nga propesyon bilang tagapatuman it laye kamana man sa anang mga amigo nga nalipay sa anang kadaeag-an sa anang karera.
Si Lagradante hay presenteng hepe it command center it PNP.
Dati imaw nga na-assign bilang hepe it Kalibo Municipal Station, kamana man sa Makato MPS, New Washington MPS ag Numancia MPS.
Naeakip man imaw sa United Nations peacekeeping force ko 2008 nga na-assign sa East Timor ag ko 2015 hay sa Haiti.
Pagkatapos it anang misyon sa UN, naging chief operations officer imaw it Special Action Force (SAF) ag kat na-promote bilang full colonel hay naging police city director it General Santos City.
Si P/Brig. Gen. Lagradante hay naeakip sa Philippine National Police Academy (PNPA) Class of 1994 kun sa siin kaklase nana ro tatlong iba pa nga kaibahan nana nga na-promote nga sanday PCol. Salvador Alacyang, PCol. Rudencido Reales ag PCol. Randy Arceo.
Si PNP chief Gen. Rommel Francisco Marbil ro nagpanguna sa seremonya kun sa siin bilin kanda nga kabay nga ro andang promosyon hay maging inspirasyon agud nga mas pang mapabaskog ro productivity it organisasyon .
