NEW WASHINGTON, Aklan—Nagapabilin nga naka-confine sa Aklan provincial hospital matapos nga tamaan it sumpak ro daywang ka eaeaki sa kinagamo nga natabo sa tunga it daywang ka grupo it mga kaeaeakin-an sa Sitio Dumlog, Barangay Poblacion, New Washington.
Ginpaathag ni Punong Barangay Alex Dela Cruz nga ro banggianay it daywang ka grupo nga ginakaeakipan it haeos mga menor de edad hay nag-umpisa pa ko dag-on 2023.
Aminado si kapitan nga malisod madakpan ro mga raya bangud sa kabisado nanda ro pasikot-sikot sa lugar ag inde eagi sanda maaktuhan it mga kapulisan.
Ginpaathag dugang ni Punong Barangay Dela Cruz nga ko 2023 hay nahusay eon ro magtimbang nga grupo apang uman nga natabo ro gulo sa tunga nanda nga haeos ap-at nga gabie eon nanda nga ginabinantayan apang inde gid nanda maaktuhan bangud sa nagaguwa ro mga raya kon uwa sanda nagarobing kaibahan ro mga kapulisan.
Ginatama-tama sigon it mga raya ro matawhay nga tungang gabie.
Ro insidente ag mga imbolbado sa kinagamo partikular sa paghaeabyan it mga bote hay naboe-an it video rason nga nakilaea ro mga raya ag insigidang ginpatawag it barangay council kaibahan ro andang mga ginikanan.
Samtang, padayon nga nakakulong sa lock-up cell it New Washington Municipal Police Station ro nagpaeopok it sumpak ag posibleng magapangatubang sa nagakaigong kaso.
Ro insidente hay padayon pang ginaimbestigahan it pulisya.
