Ginpahayag it defense team ni Vice President Sara Duterte nga owa nanda ginahuyap kon pila ro naging kadaeag-an ukon kapiyerdihan kada adlaw sa nagapadayun nga impeachment trial sa Senado.
Suno kay Atty. Michael Poa, ikaywang adlaw ag sa unang testigo pa eang ro nasambit nga trial rason nga masyado pang temprano para matumod raya.
Ginpaathag ni Poa nga may mga objections sanda bangud nga pila sa mga pangutana sigon it prosekyusyon hay pwedeng makaimpluwensya sa testimonya it testigo.
Dugang pa ni Poa, nagapati ro defense team nga kinahangean nga maayos ro mga records nga ginapresenta bangud nga may pilang mga dokumento nga sa tan-aw nanda hay owa naka-attach sa orihinal nga reklamo, kun sa siin, pila kara hay bukon it sakop it dag-on nga impeacheable officer ro bise presidente.
Samtang, ginpamalibaran ni Poa nga may tuyo sigon nga magpang-intimidate ro bise presidente sa pag-agto kara sa Senado kahapon.
Ginpamilit ni Poa nga ro pag-agto it bise presidente hay para makipagpueong eamang ag indi dapat nga taw-an it iba pang kahueugan.
