KALIBO, Aklan—Nagpatigayon it maeapnagong inspeksyon ro Department of Public Works and Highways (DPWH) ag Department of Environment and Natural Resources (DENR) sa improvement it circumferential road ag ro nagapadayon nga demolisyon it mga istraktura sa wetland areas sa isla it Boracay nga kaparte it an-om nga bueang rehabilitation effort.
Raya hay kasunod it pagbisita nanday DENR Sec. Roy Cimatu ag DPWH Sec. Mark Villar sa pinakasikat nga isla sa bilog nga kalibutan.
Gin-usisa it mga opisyal ro daeagan it mga proyekto sa nasambitang isla.
Nauna eon kara nga ginpahayag ni Engr. Jose Al Fruto, assistant regional director it DPWH nga padayon ro andang pakikipag-angot sa Task Force Kapatid Boracay kaangot sa pagsaylo it mga poste it kuryente nga apektado it road widening.
Sa idaeom it nasambitang proyekto, nagtaeana it pondo ro DPWH sa Aklan Electric Cooperative (AKELCO) para sa relocation it mga nasambitang poste.
Samtang, nagpaguwa eon man it mas klarong Sewage Treatment Plant (STP) clarificatory guidelines ro DENR para sa mga negosyanteng padayon nga nagaproseso it andang mga environmental permits ag clearances para makadungan sa nakataeanang uman nga pagbukas it Boracay sa maabot nga Oktubre 26, 2018.
