Indi maganaba sa siyam nga katawo ro namatay samtang 13 nga iba pa ro naninahan matapos nga owa it anuman nga rason nga nagpangbaril ro sangka 13-anyos nga estudyante sa Kahramanmaras province southern Turkey.
Base sa imbestigasyon, nagsueod ro Grade 8 student nga suspek sa nasambit nga eskwelahan nga may daeang mga baril nga ginapatihan nga ginapanag-iyahan it anang ama nga dating pulis. Insigida sigon raya nga nagsueod sa daywang classroom ag nagpa-uean it bala.
Limang baril ag pitong magazine ro daea it suspek nga ko ulihi hay namatay man, apang bukon pa it klaru kon raya hay nagpakamatay man.
Suno sa mga awtoridad ap-at sa mga naninahan ro una sa kritikal nga kondisyon, samtang ro an-um hay sa intensive care unit.
Pila sa mga estudyante hay nag-eumpat halin sa bintana it eskwelahan agud nga makapaeagiw sa pagpamaril it nasambit nga estudyante.
Gin-report man nga gindakop it mga awtoridad ro ama it suspek samtang nagapadayun ro imbestigasyon sa insidente.
Nasayuran nga natabu ro pagpamaril sang adlaw matapos ro sambilog pang insidente it pagpamaril sa iba pang eskwelahan sa Sanliurfa province kun sa siin 16 nga katawo ro naninahan.
Nagpahayag man it pakikisimpatiya si Turkish President Recep Tayyip Erdogan ag ginpahayag nga pagapasabton ro sin-o man nga mapamatud-an nga nagpabaya sa makasueubo nga hitabu.
