Ginaeauman eon ni Department of National Defense (DND) Secretary Gilberto Teodoro Jr. ro pagbaskog pa it agresyon it Chinese naval forces sa mga barko it Pilipinas nga nagapatrolya sa Scarborough shoal ag iba pang parte it West Philippine Sea.
Ginhimo it DND chief ro pahayag matapos ro closing ceremonies it dag-unang Balikatan drills sa Camp Aguinldo sa Quezon City kahapon adlaw it Biyernes, Mayo 9.
Ro sabat it opisyal kasunod eon man it insidente ku Mayo 5 kun siin nagpatigayon it agresibo ag peligroso nga aksiyon ro Chinese frigates ag coast guard vessels kontra sa offshore patrol vessel nga BRP Emilio Jacinto nga nagapatigayon kato it routine maritime patrol, 11.8 nautical miles nabagatnan-nasidlangang parte it Bajo de Masinloc.
Apang, suno sa opisyal, uwa nahadlok ro Pilipinas sa mga aksiyon it China ag ginpamilit nga padayunon ro naval forces it atong nasyon ro pagpatroliya sa lugar bilang parte it hurisdiksiyon it Pilipinas.
