Nagapadayon ro pageaom it Filipina actress nga si Dolly de Leon nga marenew para sa ikadaywang season ro Apple TV series nga “Maximum Pleasure Guaranteed,” agud mas mapaeawig pa ro istorya it anang karakter nga si Detective Sofia Gonzalez.
Ginpahayag ni De Leon nga ginpasadya nga misteryoso ro personalidad ni Detective Gonzalez.
Suno kana, ro pagkahilig it karakter sa pagsugae hay kabahin it paagi nana sa pag-imbestigar, bangud nagatuo raya nga mabahoe ro papel it suwerte sa pagdiskubre it mga ebidensya ag impormasyon.
Ginpaathag man it aktres nga bukon bisyo ro pagsugae it anang karakter, kundi eksperimento ag paagi agud masukat kon asta sa siin makabulig ro suwerte sa paghimo it mga desisyon.
Isaea man sa mga ginbilin nga may misteryo sa serye hay ro relasyon ni Detective Gonzalez sa mga kuring.
Suno kay De Leon, ginpasadya mismo it showrunner nga si David J. Rosen ag direktor nga si Dan Sackheim nga bukon klaro kon nagustuhan ukon naugot ro karakter sa mga kuring.
Sa aktuwal nga kabuhi, ginbahin ni De Leon nga mahilig gid sanda sa mga kuring ag may lima sanda ka alaga kara.
