Kalibo Aklan ———Ginhingyo it Department of Tourism (DOT) sa lokal nga gobyerno sa Aklan nga simplihan eamang ro andang mga requirements agud nga makasueod sa Isla it Boracay.
Raya hay kasunod it napabalita nga may pilang mga turista ro owa nakasakay sa andang natungdan nga flights bangud sa kapas-eawan nga makabo-oe it gina-require nga QR codes sa tamang oras.
Suno sa DOT nga mabahoe nga bulig engkaso nga maaksyunan eagi it LGU-Malay ag Provincial Government it Aklan ro hinyu sa madasig nga pagbangon it industriya it turismo sa Isla ag uman nga pagbalik it mga tourism workers nga sambilog sa mga grabeng naapektuhan it COVID-19 pandemic.
Madumduman nga umpisa ko Nobyembre 16 hay ginduea eon sa Boracay ro swab test requirement para sa mga bakunadong turista apang kinahangean sa gihapon nanda nga magsumite it mga dokumento kapareho it VaxCert PH certification ukon vaccination certificate halin sa LGU kon ro card hay owa it QR code.
Magahueat pa it confirmation halin sa Aklan province agud nga mataw-an it QR code nga pagagamiton sa pagsueod sa Isla.
