KALIBO, Aklan—Naga-abot sa kapin sa P18 milyon ro naging inisyal nga danyos it sunog nga nagtuhaw sa sangka charging station it electric trike ukon e-trike sa Sitio Diniwid, Barangay Balabag sa Isla it Boracay, aga-aga it Biyernes.
Suno kay FO1 Sky Salutin, arson investigator it Bureau of Fire Protection (BFP)-Boracay, kapin sa 40 hasta 50 nga pampasaherong e-trike sa parking lot it Core E-Trike Motors Corporation ro naabo sa sunog.
Nadaeahig pa kara ro daywang baeay nga ginapanag-iyahan nanday Nora Valencia ag Benjie Mañara ag sangka sari-sari store nga ginapanag-iyahan ni Russel Guse.
Ginpahayag nga kapin sa 10 nga e-trike eamang ro natigayon nga maipaguwa it mga tawuhan it nasambit nga establisimento bangud nga madasig nga nagkalhit ro kaeayo sa kabaskog it hangin sa lugar.
Nag-umpisa ro sunog bandang alas-2:32 it aga-aga ag umabot it sang oras ag tunga antes raya nga eubusan nga natapna ukon eksaktong alas-4:10 it agahon.
Nakabulig man sigon sa pagtapna it kaeayo ro pag-bayanihan it mga residente sa lugar ag fire responders sa isla.
Owa man it napabalitang naninahan sa insidente.
Aminado ro BFP nga medyu nabudlayan sanda sa pagresponde sa lugar bangud nga mag-eowas nga mapiot ro daean hay maabu pa nga mga manabang kable.
Nagapadayun pa ro imbestigasyon it BFP sa ginhalinan it kaeayo ag ro kabangdanan it sunog.
Umpisa Enero 1, kapin sa daywang sunog eon ro gin respondehan it BFP sa Boracay.
