KALIBO, Aklan — Arestado sa ginpatigayong operasyon it Kalibo Police Station ro sangka eaeaking nagabaligya sigon it pekeng kwarta sa Oyo Torong St. Kalibo, Aklan.
Nadakpan ro suspek sa ginpatigayong buy-bust operation nga si J-Mar Magbanua, 32, residente it Tanza, Iloilo, City, ag temporaryong naga-istar sa nasambitang lugar.
Ginpabutyag nga reseller it pekeng kwarta si Magbanua aga halin pa sa Toledo, Cebu ro anang supply.
Narekober sa anang posisyon ro 147 bilog nga pekeng P1,000 bill.
Suno kay P/CInsp. Kenneth Paneza, deputy chief of police it Kalibo PNP nga nakipagtransakyon sanda sa suspek para magbakae it daywang pekeng P1,000 bill sa balor nga P600.
Haeos sang dag-on eon sigon ro modus it suspek, kon siin nagaadto raya sa mga lugar nga may fiesta agud magbaligya it mga pekeng kwarta.
Nagapangatubang ro suspek sa kasong illegal possession of false treasury ukon bank notes.
