Posibleng may ginapagtakpan ro Armed Forces of the Philippines ukon AFP sa ginpatigayon nga anti-insurgency operation sa Toboso, Negros Occidental nga ginkamatay it 19 katawo, kaibahan ro daywang ka estudyante it University of the Philippines (UP) ag sangka lokal nga mamamahayag ko Abril 19 hasta it 20.
Raya ro naging opinyon ni dating Kabataan partylist representative Raoul Manuel matapos nga eain-eain ro statement nga ginapaguwa it AFP sa interview kanda it nagkaeain-eain nga media outlet.
Dugang pa nana nga pwede gale magclaim ro kasoldaduhan nga may napatay sa engkwentro bangud sa nagsukoe maskin nga uwa raya it kamatuoran.
Suno pa kay Manuel, inde makaangkon it kalinungan ro kaeag it mga napatay eabi eon ro ana it daywang ka estudyante bangud sa padayon ro andang paninggitan nga makaangkon it independent investigations ro natabo nga raya makaron ro ginatutukan ag ginataw-an it igtaeopangod it Commission on Human Rights ag iba pang credible human rights organizations.
Makabig nga sibilyan sanday Alyssa Alano, nga nagserbing education and research councilor it UP Diliman University Student Council ag Maureen Santuyo kamana man ro peryodistang si RJ Ledesma rason nga padayon ro andang panawagan nga makaangkon it hustisya ro andang hinali nga kamatayon.
