KALIBO, Aklan — Patay ro sangka 35-anyos nga eaeaki matapos nga bun-on it kaparehong motorcycle rider bangud sa away-trapiko, Biyernes it gabi-i sa Brgy. Tambuan, Malinao.
Owa eon it kabuhi kat maka-abot sa provincial hospital bangud sa patal nga igo it pagbuno sa magtimbang nga dughan si Nomer Icawalo, residente it nasambit nga lugar.
Base sa imbestigasyon, nagdungan sa daean ro daywa, apang gulpi sigon nga ginsinggitan ag ginbuyayaw it biktima ro suspek nga si Rico Berdandino, 18, it Brgy. Cabayugan sa nasambit man nga banwa, kaibahan ro anang daywang backrider kat magapaliko eon kunta paagto sa andang barangay.
Bangud sa pagkapikon, ginbalikan ag ginbaeabagan it suspek ro motorsiklo ni Icawalo ag dayun nga ginbo-oe ro anang siyaw ag ginbuno sa biktima.
Matapos ro pilang oras nga pagtugis, naaresto si Berdandino sa baeay it anang barkada bandang alas-11:00, Domingo it agahon ag gin-aku ro krimen nga nahimo.
Sa kustodiya makaron it Malinao Police Station ro suspek ag nagapangatubang sa nagakaigo nga kaso.
