REGIONAL News — Gin-aresto it National Bureau of Investigation ro sangka eaeaki bangud sa sextortion ukon pag-eabag sa Republic Act No. 9995 ukon Anti- Photo and Video Voyeurism Act of 2009, kamana man ro Article 286 (Grave Coercion) it Revised Penal Code (RPC).
Ro arestado hay unang nagpakilaea nga si Jake apang ko ulihi natukiban nga ro anang matuod nga pangaean hay si Jebson Palmes ag residente it San Jose, Antique.
Ginsaysay it complainant sa NBI Antique District Office nga ko Disyembre 2022 unang nakipag-angot kana ro akusado sa anang personal nga numero ag ginpahayag nga may ginabuytan imaw nga video it babaye nga naga-hubeas.
Nakabaton it friend request ag mensahe ro tagreklamo sa anang Facebook Messenger, eakip ro anang video nga nagakatueog nga owa it eambong.
Pagkabaton it mensahe, insigida nga gintawgan it tagreklamo ro akusado ag ginmanduan nga i-delete ro video.
Apang ginpahayag it eaeaki nga i-delete eamang nana ro video kun magapasugot imaw nga mag-sex sanda nga daywa.
Ginpaeag pa kara ro complainant nga iga-upload ro anang video sa Facebook kun indi imaw magapasugot sa anang ginapangayo.
Bangud sa kahadlok, napilitan ro babaye nga makipaghieawas sa akusado.
Ko Marso 24, 2025, nagpadaea it mensahe ro tagreklamo sa eaeaki nga nagahinyu nga i-delete ro video ag nagapangabay nga tapuson eon ro pagpang-abuso sekswal ag pagpamaeag nga nag-umpisa ko 2022 ag nagpadayon hasta nga raya hay nag-nabdos.
Ginmanduan it akusado ro babaye nga mag-agto sa andang baeay sa Dalipe, San Jose, Antique kun gusto gid kara nga i-delete ro video.
Bangud kara, ginpaabot it complainant sa NBI Antique District Office agents ro instruction kana it akusado.
Gin-agtunan it complainant kaibahan ro mga agents it NBI Antique District Office ro address nga gintau ni alyas Jake ag insigida imaw nga gin-aresto.
Photo & Press Release from NBI
