BALITA Espesyal– Sangka 63-anyos nga lolo sa United Kingdom, ro nakibot nga may sawa ro ginbakae nga broccoli nga dapat hay igapahaum nana sa ihapon it anang pamilya.
Suno kay Neville Linton, nabakae nana ro sangka plastic it broccoli halin sa supermarket chain nga Aldi sa Stourbridge, West Midlands ko Hunyo 2.
Pagkabakae, temporaryo nana nga gintago ro broccoli sa refrigerator.
Matapos ro tatlong araw, naisipan eon nana nga gamiton ro broccoli para sa andang ihapon.
Kat ginbuksan eon nana ro plastic nga may sueod nga broccoli, nakibot imaw nga may nagahueag sa sueod kara.
Ko una hay gin-eaum nana nga sangka caterpillar eamang apang nakumpirma nana nga raya hay sangka sawa kat makita nana ro anang ueo.
Gintago nana sa sangka plastic container ro broccoli nga may sawa ag ginbalik raya sa Aldi supermarket para magreklamo.
Nagpangayo it bulig ro mga staff it Aldi sa Dudley Zoo.
Nasayuran nga sangka baby Ladder snake ro nakit-an nga sawa sa broccoli.
Suno sa reptile experts it Dudley Zoo, owa it kamandag ro mga Ladder snake apang masakit nga magtuklaw.
Nag-offer ro manager it Aldi Stourbridge branch it refund kay Linton apang nagpamalibad raya bangud nga plano nga magpasaka it kaso kontra sa supermarket.
