Nagpaandam ro World Health Organization (WHO) nga mas madasig nga magkalhit ro Ebola virus sa Democratic Republic of Congo kumpara sa anumang naunang outbreak it makamaeatay nga sakit.
Suno kay WHO Director-General Tedros Adhanom Ghebreyesus, nag-abot eon sa masobra sa 2,000 nga kaso it Ebola ro nailista sa nasyon kaibahan kara ro 796 nga namatay, daywang buean matapos ideklara ro outbreak.
Bangud kara, ginakabig raya makaron bilang ikatlong pinakamabahoe nga Ebola outbreak nga nailista sa kasaysayan.
Ginpahayag ni Tedros nga mas madasig ro pagkalhit it presenteng outbreak kumpara sa grabeng Ebola outbreak sa DR Congo ko 2018 hasta 2020, nga umabot it masobra sa 10 buean bago makalista it 2,000 nga kumpirmadong kaso.
Madumduman nga nailista ro ika-17 nga Ebola outbreak it DR Congo ko Mayo 15 matapos ro pilang pagkamatay sa probinsiya it Ituri, sangka lugar sa naaminhan-nasidlangan it nasyon nga padayun nga nakaka-eksperyensiya it kinagamo bangud sa mga armadong grupo.
Nabudlayan man ro mga awtoridad sa pagsabat sa outbreak nagapadayun nga armed conflict sa pilang parte it DRC. Kan-o eamang, sangka Ebola treatment center sa Bunia ro gin-atake.
Sa makaron, nailista eon ro mga kaso it Ebola sa limang probinsiya it DR Congo ag maskin sa kaiping nga nasyong Uganda.
Ro presenteng outbreak hay tuga it tumaeagsahon nga Bundibugyo strain it Ebola virus, kun sa siin, owa pa it aprubadong bakuna ukon bueong.
