KALIBO, Aklan — Padayun ro imbestigasyon it kapulisan sa nakit-an nga sangka electrician nga owa eon it kabuhi sa sueod it construction site, agahon it Martes, Agosto 6, sa Vizcarra Subdivision, Brgy. Andagao, Kalibo.
Ro biktima hay nakilaea kay Alvin Nacita, 48, may asawa, residente it Miag-ao, Iloilo ag stay-in worker sa 3-storey nga underconstruction nga building sa nasambit nga barangay.
Suno kay Rogelio de Dios, katrabaho it biktima nga ulihi raya nakita nga buhi kahapon it hapon antes imaw nga magsaka sa ikatlong panaegan it gina-construct nga building pagkatapos it andang trabaho, kun sa siin imaw nagakatueog.
Mismong mga katrabaho ni Alvin ro nakakita sa anang eawas nga nagakaya sa sueod it sangka kwarto nga anang gina-eugban sa ground floor it building.
Mahipos sigon nga klase it tawo ro biktima ag owa man raya it problema sa iba pa nana nga mga katrabaho.
Ginapatihan nga ginbangungot ro biktima nga naging rason it anang kamatayon.
Presente eon nga nakikipag-angot ro Scene of the Crime Operatives (SOCO) team sa mga igbata ni Nacita para ipaidaeum sa autopsy ro anang bangkay.
Padayun pa nga ginatumod makaron kon may foul play ukon owa ro pagkamatay it biktima.
THIS IS A DEVELOPING STORY….
