KALIBO, Aklan–Uwa nagpaawat ro libo-libong katawo sa pihak it mahamog nga panyempo sa St. Peter’s Square sa Vatican City, Rome, Italy makatambong eang sa eubong it 95 anyos nga dating Santo Papa nga si Pope Benedict XVI.
Suno kay Bombo International Correspondent Girlie Ongoco, naging emotional si Pope Francis sa anang homiliya bangud nga nagbalik-tanaw raya sa pagkatawo it dating Pontiff.
Una kara, Nag-umpisa ro funeral it namatay nga si Pope Emeritus sa Vatican city bandang alas-9:30 it agahon sa Roma ukon alas-4:30 it hapon oras iya sa Pilipinas kahapon.
Bandang alas-7:00 it gabie ko miyerkules, kat ginsarado eon sa publiko ro haya para kay Pope Benedict XVI.
Ginbutang it Vatican officials ro bangkay ni Pope Benedict sa sangka coffin nga himo sa cypress wood para sa public funeral makaron nga adlaw.
Gindaea ro kabaong it Santo Papa sa atubang it St. Peter’s para sa public mass kon sa siin libu-libo ro nakit-an nga nagtambong sa funeral.
Ginbutang man sa kabaong ro commemorative medals ag coins nga ginta-o kay Pope Benedict, raya hay account it anang pagpanerbisyo bilang Santo Papa nga nakasueat sa Latin kaibahan ro anang pallium stoles nga eambong nga lana nga ginasuksok sa leog it pontiff agud simbolo it anang mga obligasyon bilang mga pastol it anang mga kawan.
Gin-eobong ro Santo Papa base sa anang hinyo sa may grottos sa idaeom it Basilica.
