KALIBO, Aklan–Nakataeana nga magpatigayun it nagkaeain-eain nga aktibidad ro Gabriela Women’s Partylist kaibahan ro iba pang grupo para ipahayag ro andang baeatyagon kadungan it ikaywang State of the Nation Address (SONA) ni Pangueong Ferdinand Marcos Jr. sa Hulyo 24.
Suno kay Gabriela Women’s Partylist Representative Arlene Brosas nga sambilog sa andang aktibidad hay ro “All workers Unity” sa Quezon City Circle kun siin makaangkon it pagtalakay sa wage hike nga nakabinbin sa kongreso ag senado.
Pagasundan sigon raya it big mobilization sa bahin it Commonwealth kun siin magabuylog ro nagkaeain-eain nga sektor agud nga ipahayag ro matuod nga estado it nasyon.
Ginpunto it mamalidha nga bukon it Maharlika Investment Fund bill ro dapat nga unahon it gobyerno bangud maabu pang mas importanteng butang nga matutukan.
Sambilog eon kara ro eugta para sa mga mangunguma kaeakip ro suporta ag pasilidad nga igatao kanda ag dugang nga sweldo it mga empleyado.
Nagaeaum sigon sanda nga masolusyonan it Regional Tripartite Wages and Productivity Board ro panawagan it mga ordinaryong trabahador agud makaeagas man sa pagtaas it presyo it mga nagapangunang baeak-eon ag serbisyo.
