Napas-eawan ro Filipino singer Matty Juniosa nga maangkon ro titulo it Britain’s Got Talent season 19 kun sa siin naangkon ro ika-ap-at nga puwesto.
Sa live finale nga ginpatigayon ko Mayo 30 (adlaw sa UK), ginkanta ni Matty ro “Nothing Compares 2 U” ni Sinéad O’Connor.
Samtang, naaangkon man it Hawkstone Farmers Choir ro kampeonato, samtang nagapangaywa ro drone art collective Celestial ag pumangatlo ro dance duo nga Anastasiia and Salsa.
Sambilog si Matty sa mga standout contestant it season matapos makabo-oe it daywang Golden Buzzers sa kompetisyon apang napas-eawan nga humakot it boto kun sa siin ginabasehan ro magadaog sa kompetisyon.
Sa anang audition, ginkanta nana ro “Purple Rain” ni Prince nga nagtau kana it Golden Buzzer halin kay judge Simon Cowell, rason nga direktang nakasueod sa semifinals ro singer.
Sa semifinals man, uman imaw nga gintaw-an it Golden Buzzer ni judge Amanda Holden matapos ro anang pag-kanta it “Dream On” it Aerosmith, nga nagdaea kana sa final round.
Tubong Mandaluyong City, unang nakilaea si Juniosa bilang contestant sa Idol Philippines ko 2019 bago nagpasakop sa vocal trio nga iDolls.
Nagsaylo imaw it Scotland ko 2022 agud nga mag-eskwela it musical theater sa Royal Conservatoire of Scotland ag umpisa kato hay nakaibahan eon sa pilang stage productions, kaeakip ro Kinky Boots ag iba pa.
Kan-o eamang hay napabalita man nga magabuyot imaw bilang Annas sa West End production it Jesus Christ Superstar.
