KALIBO, Aklan—Ginaeuman it Office of the Provincial Agriculturist ukon OPA-Aklan nga posibleng makaangkon it expanded fuel subsidy program ro Department of Agriculture para sa mga mangunguma ag mangingisda.
Suno kay Engr. Alexys Apolonio it OPA-Aklan nga maskin nga owa pa it natabu nga tensyon sa Middle East nga naging rason it sobrang pagtaas it presyo it produktong petrolyo hay may naga-eksister eon nga fuel subsidy program ro DA apang sangkiri eamang ro benepisyaryo sa probinsiya.
Sa makaron hay nagahueat sanda it anunsyo halin sa taeatapan angot sa coverage it nasambit nga programa.
Blangko pa sigon sanda kon pila ro mataw-an it nasambit nga ayuda.
Kaeabanan suno kana nga ro mga rice farmers hay nagabaton it fuel subsidy nga P5,000 samtang ro mga corn farmers ag mga mangingisda hay P3,000.
Sa idaeum it programa, ginataw-an ro mga benepisyaryo it bulig pinansyal agud nga mabawasan ro andang gastos sa operasyon kapareho it paggamit it makinarya sa pagpanguma ag baroto sa mangingisda.
Tuyo sigon kara nga mapabilin ro produksyon it pagkaon ag suportahan ro pangabuhian it mga sektor sa agrikultura ag pagpangisda.
Agud nga maging kuwalipikado, kinahangean nga nakarehistro ro mga mangunguma ag mangingisda sa Registry System for Basic Sectors in Agriculture (RSBSA).
Padayun man ro distribusyon it binhi sa mga mangunguma nga naka-rehistro sa sistema.
