NATIONAL News — Ginbutang sa posisyon bilang acting chief it Bureau of Immigration’s (BI) Border Control ag Intelligence Unit (BCIU) ro sangka ginpatalsik nga opisyal nga ginapatihan nga may kaangtanan sa pastillas bribery scheme.
Ro reappointment ni Vincent Bryan Allas hay nagpaidaeum sa maid-id nga evaluation matapos ginbasura it Court of Appeals (CA) ro anang kaso ko Enero, suno kay Immigration Commissioner Norman Tansingco.
Ko 2022, natukiban it ombudsman nga nakahimo si Allas it “grave misconduct” ag “conduct prejudicial to the best interest of service” bangod sa gina-alegar nga pagkaeakip kara sa nasambit nga scheme.
Nabulgar ro “pastillas scheme” ko 2020 kon sa siin nadiskubrehan nga ro ibang mga opisyales it BI hay nagabaton it suhoe nga naga-abot sa P10,000 para magpasueod it mga foreigners sa nasyon eabi eon ro mga Chinese.
Nagpabutyag it pagkabaeaka si Sen. Risa Hontiveros sa reappointment ni Allas sa Senate hearing ko Septyembre 5.
Suno kay Tasingco nga ginakilaea nanda ro kabug-aton it mga natabu ko nagtaliwan, apang importante man nga makaangkon it “due process” ro sangka indibidwal.
Dugang pa nga bangud nga gin-dismiss it CA ro anang kaso, ginakabig imaw nga “eligible” ukon pwede mataw-an it posisyon it bureau.
Samtang, gin-usisa man kon si Allas ro nagbulig kay dismissed Bambam Mayor Alice Guo sa pagpaeagiw, ginsabat raya ni Tansingco nga nagapatigayon pa ro BCIU it intelligence gathering ag owa raya naeakip sa pagproseso it imigrasyon sa mga pantalan ag mga airports.
