Gobyerno probinsyal, nag-apela it kooperasyon sa natungdan nga barangay council para sa hugut nga monitoring sa sand and  gravel quarry operations sa banwa it Banga

KALIBO, Aklan–Nag-apela it kooperasyon sa natungdan nga barangay council ro sangguniang panlalawigan para sa hugut nga monitoring ag regulation sa sand  and  gravel quarry operations  sa  probinsiya it aklan  partikular sa banwa it Banga.

Suno kay Aklan  2^nd district Sangguniang Panlalawigan member Jay Tejada nga ro pagbantay it mga opisyal it barangay sa pagbo-oe ag paghakot   it baeas it  mga truck halin sa  aklan river  ukon sa  quarry site  kamana man ro  pag-usisa sa mga delivery receipt hay mabahoe nga bulig.

Nagakinahangean suno kana it nagakaigo nga delivery receipt ro mga permitees antes nga makabo-oe it baeas  sa  suba.

Ro nakolekta nga mga  resibo suno kana ro ginabasehan it provincial treasurers office  sa pag-compute sa share it  barangay halin sa nasambit nga operasyon.

Nasayuran nga ko 18^th sangguniang panlalawigan hay gin-amyendahan nanda   ro mabuhay eon nga  naga-eksister nga provincial  ordinance No.  06-10 nga naga-regulate sa sand and gravel  operations  partikular ro probisyon sa sharing it ginakita halin kara, kun  sa siin mas ginpabahoe ro share it  barangay council ag munisipyo nga parehong nagabaton  it 40%  ag ro nabilin nga 20% hay ana it probinsiya.

Tuyo kara nga maging kabulig sanda sa pag-monitor ag pag-regulate sa paghakot it baeas nga ro pinaka-source hay halin sa andang barangay.

Limitado eamang sigon ro numero it mga provincial checkers nga miyembro it  task force kalikasan.

Nakabaehag sa ordinansa nga kinahangean nga hasta eamang sa 15 cubic meters ro karga it sangka truck nga nagahakot.

Sangka bayolasyon sigon kon makaangkon it overloading nga may nagakaigo nga penalidad.

Apang indi raya makonsidera kon owa it reklamo ag documentation pinaagi sa pagpa-blotter sa pulis.

Mag-eowas kara,  dapat nga may nagakaigo man nga tabon ro andang mga kargang baeas  agud nga malikawan ro pag-uyang sa karsada nga delikado sa mga motorista.

Dugang pa nga umpisa alas-8 it agahon  hasta alas-5 eamang it hapon, halin it  lunes  hasta  sabado  ginapasugtan nga  mag-quarry sa aklan river, apang anuman nga  oras hay pwedeng makahakot halin  sa stock pile sa quarry site.

Madumduman nga nauna eon nga ginareklamo it barangay council, residente ag mga motorista ro pirme ag haeos owa it katapusan nga pag-repair sa provincial road nga sakop it  barangay bacan sa banwa it banga  nga makabig nga takaw-disgrasya.